Nashik Municipal Corporation Recruitment 2025: नाशिक महापालिकेला १४० तांत्रिक पदांच्या भरतीपाठोपाठ आता शासनाने महापालिकेला अग्निशमन व आपत्कालीन सेवा विभागातील २४६ पदांच्या भरतीला परवानगी दिली आहे. सिंहस्थाच्या पार्श्वभूमीवर अग्निशमन व आपत्कालीन सेवा विभागाच्या भरतीसाठी ३५ टक्के आस्थापना खर्चाची अट शासनाने शिथिल केली आहे. त्यामुळे सिंहस्थासाठी आवश्यक मनुष्यबळ उपलब्ध होणार आहे.
सिंहस्थाच्या पार्श्वभूमीवर महापालिकेला सध्या मनुष्यबळाचा तुटवडा जाणवत आहे. महापालिकेचा आस्थापना खर्च ३५ टक्क्यांपेक्षा अधिक असल्यामुळे नोकरभरतीला परवानगी मिळत नाही. महापालिकेच्या आस्थापना परिशिष्टावर सध्या ७ हजार ७२५ पदे मंजूर आहेत. त्यापैकी तब्बल साडेतीन हजार पदे निवृत्ती, स्वेच्छानिवृत्तीमुळे रिक्त आहेत. यामुळे महापालिकेच्या प्रशासकीय कामकाजावर विपरित परिणाम होत आहे.
महापालिकेचा दर्जा ‘ब’ वर्गाचा असला तरी, आस्थापना मात्र ‘क’ वर्गाची आहे. सन २०१८ मध्ये १४ हजार पदांचा सुधारित आकृतिबंध महापालिकेने शासनाच्या मान्यतेसाठी पाठविला होता. नगरविकास विभागाने त्यावर आक्षेप घेतल्याने तो रखडला होता. दरम्यान, करोनाकाळात तातडीची बाब म्हणून वैद्यकीय, आरोग्य तसेच अग्निशमन विभागातील ७०६ पदांच्या भरतीला शासनाने मंजुरी दिली होती. यासाठी टीसीएस कंपनीसोबत करारही करण्यात आला होता. परंतु, ही भरतीही होऊ शकली नाही.
आगामी सिंहस्थ कुंभमेळा लक्षात घेता महापालिकेतील अपुरे मनुष्यबळ अडचणीचे ठरणार आहे. आपत्ती नियोजनावर त्याचा परिणाम होण्याची शक्यता लक्षात घेता महापालिकेच्या प्रस्तावानुसार आस्थापना खर्चाची अट शिथिल करीत अग्निशमन व आपत्कालीन सेवा विभागातील २४६ पदांच्या भरतीचा मार्ग शासनाने खुला केला आहे.
उत्पन्न वाढविण्याची अट –
महापालिकेला २४६ पदे भरण्यासाठी सशर्त परवानगी देण्यात आली आहे. ही भरती करण्यासाठी महापालिकेला उत्पन्नाचे स्रोत वाढविण्याचे निर्देश देण्यात आले आहेत. शासनाने निश्चित केलेल्या अर्हता निकषांचे, तसेच विहित कार्यपद्धतीचे काटेकोर पालन करूनच ही नोकरभरती करण्याची जबाबदारी महापालिका आयुक्तांवर सोपविण्यात आली आहे. याचबरोबर आस्थापना खर्च मर्यादेत राहावा, यासाठी आवश्यक त्या उपाययोजना देखील कराव्या लागणार आहेत. या संदर्भातील शासनाच्या नगरविकास विभागाचे उपसचिव अजिंक्य बगाडे यांच्या स्वाक्षरीचे पत्र महापालिकेला प्राप्त झाले आहे.
महत्वाची माहिती पाहण्यासाठी येथे क्लिक करा