Gold Silver Price Today: सोन्या-चांदीच्या किमतींसाठी या आठवड्याची सुरुवात मोठ्या घसरणीनं झाली आहे. सोमवारी देशांतर्गत कमोडिटी मार्केटमध्ये मोठे चढ-उतार पाहायला मिळाले, त्यानंतर २४ मार्च, मंगळवारी देखील मोठी घसरण नोंदवली जात आहे. मल्टी कमोडिटी एक्सचेंज ऑफ इंडिया (MCX) वर आज सोन्याचा भाव १,३७,०३२ रुपये प्रति १० ग्रॅम आणि चांदीचा भाव २,१७,०२६ रुपये प्रति किलोवर आला आहे.
२४ मार्च रोजी किमतीत मोठी घट
देशांतर्गत वायदा बाजारात आज बाजार उघडल्यानंतर सोन्याच्या किमतीत २,२४८ रुपये प्रति १० ग्रॅम आणि चांदीच्या किमतीत ८,३९७ रुपये प्रति किलोची मोठी घसरण नोंदवण्यात आली. सोमवारी एमसीएक्सवर सोन्याची किंमत १,३९,२८० रुपये प्रति १० ग्रॅम आणि चांदीची किंमत २,२५,४२३ रुपये प्रति किलोवर बंद झाली होती.
ऐतिहासिक उच्चांकावरुन दर किती कमी झाले?
२९ जानेवारी २०२६ रोजी सोने आणि चांदीच्या किमतींनी आतापर्यंतचा उच्चांकी स्तर (All-time High) गाठला होता. तेव्हा सोन्याचा भाव १,८०,००० रुपये प्रति १० ग्रॅमवर पोहोचला होता. म्हणजेच, आपल्या ऐतिहासिक विक्रमापासून सोनं ४२,९६८ रुपयांनी खाली आलंय.
तसंच, २९ जानेवारी २०२६ रोजी चांदीची किंमत ४,२०,००० रुपये प्रति किलोवर पोहोचली होती. तिथून आता चांदी २,०२,९७४ रुपये प्रति किलोनं खाली घसरली.
मध्य पूर्वेतील वाढता भू-राजकीय तणाव
सोमवारी अमेरिकेचे राष्ट्राध्यक्ष डोनाल्ड ट्रम्प यांनी इराणच्या वीज प्रकल्पांवरील हल्ले ५ दिवसांसाठी पुढे ढकलण्याची घोषणा केली. यामुळे मध्य पूर्वेतील वाढता तणाव कमी होत असल्याचं वाटत होतं. मात्र, मंगळवारी इराणनं उत्तर दिले की त्यांनी अमेरिकेसोबत कोणत्याही प्रकारची चर्चा केलेली नाही.
यामुळे पुन्हा भू-राजकीय तणाव वाढताना दिसत आहे. डोनाल्ड ट्रम्प यांच्या विधानानंतर कच्च्या तेलाच्या किमतीत १० टक्क्यांहून अधिक घसरण झाली होती, परंतु आज पुन्हा तेजी परतली आहे. त्यामुळेच सोने-चांदीसारख्या मौल्यवान धातूंवर दबाव वाढताना दिसत आहे.
महत्वाची माहिती पाहण्यासाठी येथे क्लिक करा
