Salary and Pension Limit Hike : 2026 या नवीन वर्षाच्या सुरुवातीसह सरकारी कर्मचाऱ्यांना आठवा वेतन आयोग कधी लागू होईल याची उत्सुकता लागून आहे. पण, आठव्या वेतन आयोगाच्या अंमलबजावणीपूर्वीच काही केंद्र सरकारी कर्मचारी आणि पेन्शनधारकांसाठी आनंदाची बातमी आली आहे.
कर्मचाऱ्यांसाठी आठवा वेतन आयोग स्थापन केला गेला आहे, पण आठवा वेतन आयोग लागू होण्यापूर्वीच काही केंद्र सरकारी कर्मचारी आणि निवृत्ती वेतनधारकांसाठी आनंदवार्ता आली आहे. केंद्र सरकारने सार्वजनिक क्षेत्रातील विमा कंपन्या (PSGICs), राष्ट्रीय कृषी आणि ग्रामीण विकास बँक (NABARD) आणि भारतीय रिझर्व्ह बँक (RBI) च्या कर्मचारी आणि निवृत्तीवेतनधारकांसाठी पगार आणि निवृत्तीवेतन वाढीस मान्यता दिली आहे.
कर्मचाऱ्यांचे मनोबल वाढवण्यास आणि आर्थिक क्षेत्रातील पेन्शनधारकांसाठी सामाजिक सुरक्षा मजबूत करण्यासाठी अर्थ मंत्रालयाने हा निर्णय घेतला असून या निर्णयाचा फायदा अंदाजे 46,322 कर्मचारी, 23,570 निवृत्तीवेतनधारक आणि 23,260 कुटुंब निवृत्ती वेतनधारकांना होणे अपेक्षित आहे. सरकारी निवेदनानुसार, सार्वजनिक क्षेत्रातील सामान्य विमा कंपन्यांच्या (PSGICs) कर्मचाऱ्यांसाठी वेतन सुधारणा 1 ऑगस्ट 2022 पासून लागू होईल ज्यामुळे त्यांच्या वेतन बिलात एकूण 12.41% वाढ होईल.
PSGIC मध्ये नॅशनल इन्शुरन्स कंपनी लिमिटेड, न्यू इंडिया अॅश्युरन्स कंपनी लिमिटेड, ओरिएंटल इन्शुरन्स कंपनी लिमिटेड, युनायटेड इंडिया इन्शुरन्स कंपनी लिमिटेड, जनरल इन्शुरन्स कॉर्पोरेशन ऑफ इंडिया आणि अॅग्रिकल्चरल इन्शुरन्स कंपनी लिमिटेड सारख्या कंपन्या आहेत.
आरबीआय पेन्शनधारकांना अधिक फायदे मिळतील
सरकारने रिझर्व्ह बँकेच्या निवृत्तीवेतन आणि कुटुंब निवृत्तीवेतन योजनांमध्ये बदल करण्यास मान्यता दिली आहे. यानुसार 1 नोव्हेंबर 2022 पासून लागू होणाऱ्या मूळ पेन्शन आणि महागाई भत्त्यापेक्षा पेन्शन आणि कुटुंब निवृत्तीवेतन 10% वाढेल. अशा स्थितीत, सर्व निवृत्ती वेतनधारकांचे मूळ पेन्शन 1.43 पटीने वाढेल, ज्यामुळे मासिक पेन्शनमध्ये लक्षणीय सुधारणा होईल. या बदलाचा एकूण 30,761 व्यक्तींना फायदा होईल, ज्यात 22580 निवृत्तीवेतनधारक आणि 8,189 कुटुंब निवृत्तीवेतनधारक आहेत.
त्याचप्रमाणे, 1 नोव्हेंबर 2022 पासून नाबार्ड कर्मचाऱ्यांसाठी पगारवाढ देखील लागू केली गेली आहे. वेतन सुधारणेमुळे सर्व गट ‘अ’, ‘ब’ आणि ‘क’ कर्मचाऱ्यांच्या वेतन आणि भत्त्यांमध्ये अंदाजे 20% वाढ होईल.
नाबार्डने मूळ भरती केलेल्या आणि 1 नोव्हेंबर 2017 पूर्वी निवृत्त झालेल्या निवृत्त कर्मचाऱ्यांचे मूळ पेन्शन व कुटुंब पेन्शन आता आरबीआयच्या आधीच्या नाबार्डमधून निवृत्त झालेल्या कर्मचाऱ्यांइतके करण्यात आले आहे.
महत्वाची माहिती पाहण्यासाठी येथे क्लिक करा